آئینہ مانگوں تو کیسی وہ سزا دیتا ہے

آئینہ مانگوں تو کیسی وہ سزا دیتا ہے

لے کے ہاتھوں میں اِک آئینہ دکھا دیتا ہے

وقت ہے ، خواب ہے ، خوشبو ہے کہ پیکر کوئی

کون ہے جو مجھے سوتے سے جگادیتا ہے

ایک چَرواہا گھنے پیڑ کے نیچے بیٹھا

داستاں اپنی پرندوں کو سُنادیتا ہے

موت کے مُنہ سے کئی بار نکل آیا ہوں

کون ہے جو مجھے جینے کی دعا دیتا ہے

ایک کمزور سا لمحہ شبِ تنہائی کا

مجھ کو خود اپنی ہی نظروں سے گِرا دیتا ہے

دِن کے ہنگاموں میں ہنستا ہوں ، چہکتا ہوں متین

شب کی تنہائی میں ، آئینہ رُلا دیتا ہے!