| درد کے رشتے جہاں بھی جائیے پائندہ ہیں |
| جیسے سورج کی شعاعیں، ہر جگہ رقصندہ ہیں |
| جسم سے باہر نکل کر آنکھ پھرتی ہی رہی |
| اور جب لوٹی تو اس سے خواب کیوں شرمندہ ہیں |
| راکھ ہو تو تم اپنے جسموں سے تو ہم ہیں روشنی |
| سارے منظر اِک ہماری خاک سے تابندہ ہیں |
| سایہ سایہ جانے والو، دُھوپ کے رستے چلو |
| تاکہ یہ محسوس ہو جائے ابھی دِل زندہ ہیں |
| آفریدہ ہوں خود اپنی آنکھ کے شہتیر کا |
| اس لیے میری نگاہوں میں سبھی رخشندہ ہیں |
| اپنی آنکھوں میں کتابیں لے کے پھرتا ہوں متین! |
| جن کو پڑھ کر آسماں زادے بہت شرمندہ ہیں |
غیاث متین [پ: 10/نومبر 1942 ، م: 21/اگست 2007] کی یہ آفیشیل ویب سائٹ ہے جو ان کے فرزند سید آفاق متین کی زیر نگرانی قائم کی گئی ہے۔
غیاث متین نے جامعہ عثمانیہ سے ایم۔اے (گولڈ میڈلسٹ) کی تکمیل کے بعد سری وینکٹیشورا یونیورسٹی، تروپتی سے بی۔ایڈ کیا۔ بعد ازاں پروفیسر مغنی تبسم صدر شعبۂ اردو، جامعہ عثمانیہ کی زیر نگرانی ''ن۔م۔راشد - ایک تجزیاتی مطالعہ'' کے عنوان سے ڈاکٹریٹ کی تکمیل کی۔ شعبۂ اُردو ، جامعہ عثمانیہ میں لکچرر کی حیثیت سے جنوری 1975 میں ان کا تقرر عمل میں آیا۔ 1992 میں پروفیسر کے عہدے پر فائز ہوئے ۔ 1995-98 صدر شعبۂ اُردو اور 1996-98 چیئرمین بورڈ آف اسٹیڈیز کی حیثیت سے خدمات انجام دیں۔ نومبر 2002ء کو وظیفہ حسن خدمت پر سبکدوش ہوئے ۔
کوئی تبصرے نہیں:
ایک تبصرہ شائع کریں