پہلے بن جاتے تھے جس کے واسطے پیکر چراغ

پہلے بن جاتے تھے جس کے واسطے پیکر چراغ

مجھ سے نابینا کو ہیں، اب راہ کے پتھر، چراغ

کیوں کسی کو ڈھونڈتے ہو ہاتھ میں لے کر چراغ

تم اگر سورج ہو تو آئیں گے خود چل کر چراغ

دیکھنا اُس کو اگر ہے ان چراغوں کو بجھاؤ

کیسے دیکھو گے اُسے تم سامنے رکھ کر چراغ

جن کی قسمت میں نہ سورج ہے نہ کوئی چاند ہے

دُھول اُن کے واسطے ہے آئینہ، ٹھوکر چراغ

اِک اِنہی سے روشنی ملتی ہے مجھ کو راہ بھی

ہاتھ میں میرے نہیں یہ بادہ و ساغر چراغ

اب جو لوٹا ہوں تو سب حیرت سے تکتے ہیں مجھے

جام و مینا، گنبد و محراب و بام و دَر، چراغ

وہ جو سورج ہیں مگر جن کے گھروں میں رات ہے

ہنس لیا کرتے ہیں اُن کے حال پر اکثر، چراغ

شب تو اندھی ہے، رہے گی عمر بھر اندھی متین

یا جلوں میں شام سے یا پھر جلیں دن بھر چراغ