| پروں کو اپنے نہ پھیلاؤ پرندو |
| ہے بارش تیز گھر جاؤ پرندو |
| بہت ہی خوب ہے یہ چہچہانا |
| پہاڑی گیت بھی گاؤ پرندو |
| سمندر دانہ دانہ جب بکھیرے |
| سمندر میں اُتر جاؤ پرندو |
| وہ موسم اب نہ آئیں گے پلٹ کر |
| چلو اب لوٹ بھی آؤ پرندو |
| تمہارے واسطے، یہ آسماں ہے |
| زمیں پر تھوکتے جاؤ پرندو |
| تمہیں سے ہم نے سیکھا تھا، سمجھنا |
| ابھی کچھ اور سمجھاؤ پرندو |
| مجھے سرخاب کے پر کی ہے خواہش |
| کہیں سے ڈھونڈ کر لاؤ پرندو |
غیاث متین [پ: 10/نومبر 1942 ، م: 21/اگست 2007] کی یہ آفیشیل ویب سائٹ ہے جو ان کے فرزند سید آفاق متین کی زیر نگرانی قائم کی گئی ہے۔
غیاث متین نے جامعہ عثمانیہ سے ایم۔اے (گولڈ میڈلسٹ) کی تکمیل کے بعد سری وینکٹیشورا یونیورسٹی، تروپتی سے بی۔ایڈ کیا۔ بعد ازاں پروفیسر مغنی تبسم صدر شعبۂ اردو، جامعہ عثمانیہ کی زیر نگرانی ''ن۔م۔راشد - ایک تجزیاتی مطالعہ'' کے عنوان سے ڈاکٹریٹ کی تکمیل کی۔ شعبۂ اُردو ، جامعہ عثمانیہ میں لکچرر کی حیثیت سے جنوری 1975 میں ان کا تقرر عمل میں آیا۔ 1992 میں پروفیسر کے عہدے پر فائز ہوئے ۔ 1995-98 صدر شعبۂ اُردو اور 1996-98 چیئرمین بورڈ آف اسٹیڈیز کی حیثیت سے خدمات انجام دیں۔ نومبر 2002ء کو وظیفہ حسن خدمت پر سبکدوش ہوئے ۔
کوئی تبصرے نہیں:
ایک تبصرہ شائع کریں