| اپنے کمرے میں بیٹھا رہا کورا کاغذ |
| آئینہ دیکھ کے روتا رہا کورا کاغذ |
| جب کئی چہرے اسے دیکھ کے مُنہ پھیر گئے |
| اپنے اندر ہی سُلگتا رہا کورا کاغذ |
| گھر میں جب اس کے لیے کوئی جگہ ہی نہ رہی |
| بادلوں کی طرح اُڑتا رہا کورا کاغذ |
| کوئی آئے ، کوئی دیکھے کہ یہاں صدیوں سے |
| اپنی ہی آگ میں جلتا رہا ، کورا کاغذ |
| کورے کاغذ کا کہاں تک لکھوں احوال متین |
| سانس لینے کو ، ترستا رہا کورا کاغذ |
غیاث متین [پ: 10/نومبر 1942 ، م: 21/اگست 2007] کی یہ آفیشیل ویب سائٹ ہے جو ان کے فرزند سید آفاق متین کی زیر نگرانی قائم کی گئی ہے۔
غیاث متین نے جامعہ عثمانیہ سے ایم۔اے (گولڈ میڈلسٹ) کی تکمیل کے بعد سری وینکٹیشورا یونیورسٹی، تروپتی سے بی۔ایڈ کیا۔ بعد ازاں پروفیسر مغنی تبسم صدر شعبۂ اردو، جامعہ عثمانیہ کی زیر نگرانی ''ن۔م۔راشد - ایک تجزیاتی مطالعہ'' کے عنوان سے ڈاکٹریٹ کی تکمیل کی۔ شعبۂ اُردو ، جامعہ عثمانیہ میں لکچرر کی حیثیت سے جنوری 1975 میں ان کا تقرر عمل میں آیا۔ 1992 میں پروفیسر کے عہدے پر فائز ہوئے ۔ 1995-98 صدر شعبۂ اُردو اور 1996-98 چیئرمین بورڈ آف اسٹیڈیز کی حیثیت سے خدمات انجام دیں۔ نومبر 2002ء کو وظیفہ حسن خدمت پر سبکدوش ہوئے ۔
کوئی تبصرے نہیں:
ایک تبصرہ شائع کریں