دشمن کو بھی یار بنا کر دیکھیں گے

دشمن کو بھی یار بناکر دیکھیں گے

آتش کو گلزار بناکر دیکھیں گے

کون عیادت کو آتا ہے ، کون نہیں

خود کو اب بیمار بناکر دیکھیں گے

جوڈو اور کراٹے کا فن سیکھیں گے

ہاتھوں کو تلوار بناکر دیکھیں گے

بہت ہوا ، اب چل کر ، اپنا گھر ہم بھی

سات سمندر پار بناکر دیکھیں گے

کیسا پیکر بنتا ہے ان لفظوں سے

لفظوں کو زر تار ، بناکر دیکھیں گے

ٹی وی ، وی سی آر ، سھبی کچھ ہے گھر میں

اب اِک چھوٹا بار ، بناکر دیکھیں گے

آنکھوں کے دریا میں کون اُترتا ہے

پانی میں دیوار ، بناکر دیکھیں گے

یہ سوچا ہے آئینے میں اب خود کو

سر تا پا اظہار ، بنا کر دیکھیں گے

مغنی ، مصحف ، خالد ، اور قدیر زماں

ان پھولوں کا ہار بناکر دیکھیں گے

انسانوں کے اس جنگل میں آج متین !

چہرے کو اخبار ، بناکر دیکھیں گے