کاغذوں کے ٹکڑوں سے آئینہ بناتے ہیں

(نذر کمار پاشی )

کاغذوں کے ٹکڑوں سے آئینہ بناتے ہیں

ہم ہیں کیسے دیوانے ، کیا سے کیا بناتے ہیں

وہ عَصائے موسٰی تھا ، یہ قلم ہمارا ہے

اس سے ہم بھی پانی میں راستہ بناتے ہیں

اب ہماری بستی کا حشر بھی وہی ہوگا

اب ہمارے بچے بھی زائچہ بناتے ہیں

آنکھ ، خواب ، تنہائی ، دھوپ ، ریت ، سناٹا

ان پرانی اینٹوں سے گھر نیا بناتے ہیں

ہم اُداس موسم کے آخری پرندے ہیں

برف زار پر اپنے نقشِ پا ، بناتے ہیں

تتلیوں کے پر جیسے ، خواب ہیں متین اپنے

ہاتھ بھی نہیں آتے ، سلسلہ بناتے ہیں !