خود اپنے شکنجے میں گرفتار نہ ہونا

خود اپنے شکنجے میں گرفتار نہ ہونا

ہونا بھی پڑے تو سرِ بازار نہ ہونا

دیوار کو ڈھانا بہت آسان ہے لیکن

مشکل ہے کسی کے لیے ، دیوار نہ ہونا

اس راہ میں آگے کوئی دریا بھی ملے گا

تم اس سے گزرتے ہوئے بیزار نہ ہونا

جانے یہ ہواوں کی شرارت ہے کہ عادت

موسم کا ثمر کا سرِ اشجار نہ ہونا

ہم جیسے برے لوگ بھی یاد آئیں گے تم کو

پردیس میں رہ کر کبھی بیمار نہ ہونا

یہ دام ، یہ دانہ ، یہ شکاری ہے ، پرندہ

جب پر ہیں تمہارے تو گرفتار نہ ہونا

مجھ سے مِرا سایہ یہی کہتا ہے متین آج

دیوار نہ ہونا ، کبھی دیوار نہ ہونا