| خُشک دریاوں کو پانی دے گیا |
| یاد کا موسم ، نشانی دے گیا |
| دھوپ کے چہرے پہ بارش کی لکیر ، |
| کیسا منظر تھا ، کہانی دے گیا |
| وقت بھی کتنا سِتم ایجاد ہے |
| اپنے گھر کی پاسبانی دے گیا |
| وہ تو آیا تھا ، رُلانے کو مگر |
| عُمر بھر کی شادمانی دے گیا |
| خواب کے سارے پرندے اُڑ گئے |
| وقت ، تعبیریں پُرانی دے گیا |
| زخم پہلے بات کرتے تھے متین |
| کون اِن کو بے زبانی دے گیا! |
غیاث متین [پ: 10/نومبر 1942 ، م: 21/اگست 2007] کی یہ آفیشیل ویب سائٹ ہے جو ان کے فرزند سید آفاق متین کی زیر نگرانی قائم کی گئی ہے۔
غیاث متین نے جامعہ عثمانیہ سے ایم۔اے (گولڈ میڈلسٹ) کی تکمیل کے بعد سری وینکٹیشورا یونیورسٹی، تروپتی سے بی۔ایڈ کیا۔ بعد ازاں پروفیسر مغنی تبسم صدر شعبۂ اردو، جامعہ عثمانیہ کی زیر نگرانی ''ن۔م۔راشد - ایک تجزیاتی مطالعہ'' کے عنوان سے ڈاکٹریٹ کی تکمیل کی۔ شعبۂ اُردو ، جامعہ عثمانیہ میں لکچرر کی حیثیت سے جنوری 1975 میں ان کا تقرر عمل میں آیا۔ 1992 میں پروفیسر کے عہدے پر فائز ہوئے ۔ 1995-98 صدر شعبۂ اُردو اور 1996-98 چیئرمین بورڈ آف اسٹیڈیز کی حیثیت سے خدمات انجام دیں۔ نومبر 2002ء کو وظیفہ حسن خدمت پر سبکدوش ہوئے ۔
کوئی تبصرے نہیں:
ایک تبصرہ شائع کریں